Ново зголемување на невработеноста во Британија
Лондон, 15 октомври (МИА) - Бројот на луѓето кои се без работа во Велика Британија, продолжува да расте и на почетокот од септември достигна 1,79 милиони, соопшти државниот Завод за статистика.
Во периодот меѓу јуни и крајот на август, невработеноста во земјата е зголемена за уште 164 илјади луѓе, што е најголем пораст во еден квартал од 1991 година, додека 930 илјади луѓе се пријавени на берзата за работа, трагајќи по ново вработување, јави дописникот на МИА од Лондон.
Според податоците на британската статистика, процентот на невработеноста во земјата сега изнесува 5,7 отсто, што се смета како нов силен доказ за економската криза во која се наоѓа Британија.
Владата најави, дека ќе издвои дополнителни 100 милиони фунти за преквалификација и за ново обучување на луѓето кои останаа без работа, како последица на најновата економска и финансиска криза.
Лондонски „Дејли телеграф“, вели дека, интервенцијата на државите во светот со преку три илјади милијарди „свежи пари“ во приватните банки, за поправање на нивната неликвидност, најверојатно ќе помогне да не дојде до распад на банкарскиот систем и до крах на економијата, но тоа сигрно брзо ќе се одрази врз т.н. реално стопанство, чии последици ќе се чувствуваат подолго време.Тоа посебно ќе се забележи во Британија поради преголемата задолженст на нејзините граѓани.
Порастот на инфлацијата до сегашните 5,2 отсто и зголемувањето на невработеноста се најсилните показатели дека земјата влегува забрзано во рецесија.
Економски експерти предвдуваат до крајот на оваа година, земјата да остане без никаков пораст на нејзината економија, што и технички означува рецесија, со која британската економија ќе влезе и во следната 2009 година.
Најголеми последици засега има во градежната индустрија и во градежништвото, поради целосниот застој на пазарот за недвижен имот.
Анализата на податоците на државната статистика за невработеноста, предупредуваат дека до крајот на оваа година дури два милиони луѓе во Велика Британија може да останат без работа.
|