Даблин, 3 октомври (МИА) - Над две третини од ирските избирачи, односно 67,13 отсто го поддржаа Лисабонскиот договор, покажуваат официјалните резултати, објавени вечерва од Изборната комисија.
Со „не“ гласале 32,87 проценти од луѓето кои го искористиле своето право на глас.
Од вкупно 43 изборни места, избирачите само во две од нив кажале преовладувачко „не“ на новиот европски договор.
Од останатите 41 окрузи, 31 го отфрлија Лисабонскиот договор на претходниот референдум во јуни минатата година. Овојпат резултатите не се само различни, туку приврзаниците на новиот европски договор и по места извојуваат убедлива победа. На пример во југозападен Даблин - бастион на противниците на договорот, 59 проценти од избирачите кажаа „да“ на договорот. За споредба, на претходниот референдум, 65 проценти од локалните жители гласаа со „не“.
Новиот европски договор доби најголема поддршка во избирачкиот округ во северен Даблин - 82 проценти.
На првиот референдум Ирците го отфрлија Лисабонскиот договор со 53,4 отсто. Со „да“ гласаа 46,6 проценти.