Брисел, 14 октомври (МИА) - Комесарот за проширување на ЕУ Оли Рен изјави дека сака да остане во Европската комисија во следните пет години при што би бил задолжен за надворешната политика или економски прашања.
- Мотивиран сум да продолжам да бидам во служба на Европа. Би сакал да имам значајна улога во областа на надворешната политика или економијата, изјави Рен.
Новата влијателна функција на висок претставник за надворешна политика на ЕУ ќе биде формирана врз основа на Лисабонскиот договор.
- Би сакал да го искористам искуството во ЕУ во следниот мандат на Европската комисија за да помогнам Унијата да ја подобри својата работа и ја зајакне заедничката надворешна и безбедносна политика, вели Рен.
Во дипломатски кругови тој се споменува како кандидат за новата функција како и Карл Билт, францускиот пратеник во ЕП Мишел Барние, поранешната австриска министерка за надворешни работи Урсула Пласник, Франко Фратини и Крис Патен, поранешен комесар на ЕУ.