Берлин, 9 ноември (МИА) - Берлин денеска со повеќе свечени манифестации го одбележува падот на Берлинскиот ѕид, со кој се стави крај на Студената војна и се означи почетокот на обединувањето на Германија и на Европа.
Во главниот град на Германија денеска ќе пристигнат лидерите од цела Европа и на четирите големи сили, кои ја окупираа Германија по поразот што таа го претрпе во Втората светска војна во 1945 година, САД, Русија, Велика Британија и Франција.
Вечерва се очекува да се соберат околу сто илјади лица пред Бранденбуршката порта, симболот на Берлин, до кој се простираше „ѕидот на срамот“, издигнат во 1961 година, за да се спречат граѓаните на комунистичка Источна Германија, да пребегнат кон Западот.
Американскиот државен секретар Хилари Клинтон во Германија пристигна вчера и упати порака за силно партнерство меѓу САД и Европа со цел заеднички да се придонесе за „падот на ѕидовите на 21. век“.
Таа од името на германскиот народ ја доби наградата на Атлантскиот совет „Предизвици пред слободата“ за улогата во падот на Берлинскиот ѕид пред 20 години.
- Нема ѕид, кој не можеме да го урнеме, нема вистина, која не заслужува да ја одбраниме, изјави шефот на американската дипломатија и додаде дека најголеми предизвици за меѓународната заедница во моментов се тероризмот, климатските промени и ширењето на нуклеарното оружје.
Клинтон на синоќешната вечера во Атлантскиот совет, американска организација за развој на трансатлантските односи, упати апел до Европејците и Американците заеднички да се соочат со новите глобални закани.
- Нашата историја не заврши ноќта кога падна ѕидот, тогаш таа започна повторно, рече Клинтон.
На свеченото одбележување денеска меѓу другите ќе учествуваат рускиот претседател Дмитриј Медведев, последниот советски лидер Михаил Горбачов, францускиот претседател Никола Саркози, поранешниот полски претседател и некогашен лидер на синдикатот Солидарност Лех Валенса, германскиот канцелар Ангела Меркел.
Предвидено е одржување на симфониски концерт под отворено небо, а планиран е и огномет.