Париз, 18 октомври 2010 (МИА) - Саудиските тајни служби пред неколку денови ги известиле европските разузнавачки агенции дека постојат закани од терористички акти во Европа и посебно во Франција, изјави францускиот министер за внатрешни работи Брис Хортефо во интервју за радио РТЛ.
- Само пред неколку часови или неколку денови, Европејците добија нова порака од саудиските служби во кои ни беше назначено дека Ал Каида од Арапскиот Полуостров без сомневање е активна или се подготвува да биде активна и дека оваа закана се однесува на целиот европски континент и посебно на Франција, нагласи Хортефо.
Покрај ова, како што јави дописникот на МИА од Париз, францускиот министер за внатрешни работи прецизира дека годишно во Франција просечно се спречуваат два атентати и дека во моментов 61 лице е затворено поради вмешаност во терористички акти.
Франција останува претпазлива имајќи ја предвид реалната закана, поради што антитерористичкиот план е задржан на високо претпоследно ниво, додаде Хортефо.