Лондон, 9 декември 2010 (МИА) - Група демонстранти кои се движеле по улиците во центарот на Лондон го нападнаа вечерва автомобилот во кој се возеше британскиот престолонаследник, принцот Чарлс и неговата сопруга Камила, војвотката од Корнвол, јави дописникот на МИА од Лондон.
Претставник на Кларенс Хаус, службената резиденција на принцот го потврди нападот и објасни дека ниту принцот ниту сопругата се повредени.
Инцидентот се случи на улицата „Риџент“ во строгиот центар на британскиот главен град, додека Чарлс и Камила се возеле кон театарот „Лондон Паладиум“ за да присуствуваат на една претстава.
Во еден момент групата демонстранти, учесници на денешните студентски протести, што се уште траат во делови од градот, го запреле автомобилот со престолонаследникот и почнале да го клоцаат.
Очевидци потврдија дека ништо при тоа друго не се случувало, па возилото потоа продолжило понатаму. Принцот Чарлс и неговата сопруга го продолжиле патувањето до театарот и присуствувале на претставата како што тоа било предвидено.