Москва, 24 јануари 2011 (МИА) - Експлозивната направа, што денеска беше активирана на аеродромот Домодедово имала моќност меѓу два и пет килограми ТНТ и била наполнета со парчиња бодликава жица, за руските агенции соопшти Владимир Маркин, официјалниот претставник на Истражниот комитет на РФ.
Во меѓувреме, претставник на руското Министерството за воздухопловство изјави дека експлозијата, спротивно на соопштенијата во некои медиуми, не се случила во таканаречената стерилна зона, туку во зоната за пристигнати патници од меѓународните летови. Во врска со ова Маркин забележа дека во овој дел на аеродромот влезот кон постојката за таксисти е слободна и преку неа може „фактички секој да влезе“.
Тој додаде дека истражните органи ги зеле видеоснимките од заштитните камери на аеродромот и внимателно ги проучуваат.
Извор близок до истрагата, за руските агенции изјави дека големиот терористички напад во Домодедово открил сериозни пропусти во организацијата на системот за безбедност на најголемиот московски аеродром.