Москва, 25 јануари 2011 (МИА) - Рускиот премиер Владимир Путин денеска изјави дека „одмаздата е неизбежна“ за вчерашниот бомбашки напад на московскиот аеродром Домодедово, при што загинаа 35, а повредени се 180 патници.
Путин денешната седница на Влада ја почна со сочувство за семејствата на жртвите од вчерашниот напад и со минута молчење за настраданите.
- Направено е гнасно, сурово и неразумно злосторство. Многу луѓе се повредени и убиени... Не се сомневам дека оваа злосторство ќе биде решено, а одмаздата ќе биде неизбежна, нагласи Путин.
Досега никој не ја има преземено одговорноста за нападот на најпрометниот московски аеродром.
Чеченските бунтовници до сега имаат преземено одговорност за низа напади во Москва и во Русија, вклучително и двојниот напад на бомбаши-самоубијци во московското метро во март 2010 година при што загинаа 40 луѓе, а Домодедово беше нивна мета во 2009 година кога загинаа 90 лица.