Рим, 24 март 2011 (МИА) - Се уште е рано да се прават обид за посредиштво во либискиот конфликт бидејќи Моамер Гадафи се уште смета дека може да победи, изјави италијанскиот премиер Силвио Берлускони во интервју за Кориера дела сера.
Во моментот никој со сигурност не може да прогнозира за траењето на мисијата.
- Мислам дека се уште не е моментот за посредништво. Рускиот премиер Владимир Путин исто така е со тој став. Гадафи се уште мисли дека може да победи бидејќи го контролира Триполи, изјави Берлускони.
Меѓународната заедница сака од либискиот лидер реално примирје. Прекинот на воените дејствија од страна на Гадафи е услов за какво и да е посредништво, по што можеме да преминеме на дипломатска фаза, додаде тој.
Премиерот уверува дека целта на акциите на коалицијата е заштита на цивилното население.
- Италија не е во војна со Либија, нагласи тој. Берлускони го акцентира барањето за единствена команда под НАТО.
- Сите членови на коалицијата се согласни, единствено француските партнери имаат извесни резерви, изјави тој.