Рим, 5 април 2011 (МИА) - Шефот на италијанската дипломатија Франко Фратини вчера изјави дека либискиот лидер Моамер Гадафи и неговото семејство треба да ја остават власта и оти меѓународната заедница ќе ги спречи дипломатските обиди на Гадафи да го наруши нејзиното единство.
Изјавата на Фратини уследи откако „Њујорк тајмс“ објави дека двајцата синови на Гадафи, Сејф ал Ислам и Саади предложиле Моамер Гадафи да се повлече и власта да му ја предаде на Сејф ал Ислам.
Фратини ја повика меѓународната заедница да остане единствена и покрај започнатата посета на либискиот заменик-министер за надворешни работи Абдел Ати ал Обејди на Грција, на Турција и на Малта.
Претходно, Фратини изјави дека Италија го признава Преодниот нацинален совет на Либија како единствен легитимен соговорник.