Бенгази, 13 јуни 2011 (МИА) - Германија го призна бунтовничкиот Преоден национален совет како единствен легитимен претставник на либискиот народ, јави телевизијата „Ал Џазира“.
Германскиот министер за надворешни работи Гидо Вестервеле денеска престојува во посета на Бенгази, каде се наоѓа седиштето на Преодниот национален совет, на средба со лидерите на либиската опозиција.
По пристигнувањето во Бенгази, Вестревеле изјави дека целта на неговата посета е „да ја поддржи либиската револуција и Преодниот национален совет“.
Владата во Берлин минатата недела најави дека ќе отвори Канцеларија за врски во Бенгази, преку која ќе се воспoстави контакт со либиските бунтовници.
Германија, која е непостојана членка на Советот за безбедност на ОН, беше воздржана при гласањето за Резолуцијата на Светската организација со која се овозможи меѓународна воена интервенција против владините сили во Либија.