Рим, 8 ноември 2011 (МИА) - Италијанскиот премиер Силвио Берлускони потврди дека ќе се повлече од функцијата кога парламентот ќе го одобри новиот нацрт-закон за буџетот во кој ќе бидат и економските мерки за штедење ветени на Брисел.
- По прифаќањето на законот во кој има промени што ги бара Европа, ќе поднесам оставка за да дозволам претседателот на државата да почне консултации, изјави Берлускони.
Премиерот призна дека парламентот е парализиран односно Долниот дом каде тој веќе нема апсолутно мнозинство.
- Во Сенатот десноцентристите имаат добро мнозинство. Но, со напуштањето на седум членови од владејачкото мнозинство денеска, Владата веќе нема мнозинство какво што имавме во Долниот дом и ние треба да погледнеме на таа ситуација со реалност, изјави Берлускони. Тој додаде дека Италија треба да покаже дека е способна за сериозни реформи и единствената реална можност за излез од политичката криза се нови избори.