Осло, 16 април 2012 (МИА) - Масовниот убиец Андерс Брејвик денеска на почетокот на судењето во Осло изјави дека не го признава норвешкиот суд за легитимен и ги отфрли обвинувањата за тероризам и кривична одговорност за убиствата, истакнувајќи дека дејствувал во самоодбрана.
- Ги признавам делата, но не и кривичната одговорност, а тоа го извршив во самоодбрана, изјави Брејвик во судницата во Осло.
Откако обвинителката Инга Бејер Енгх речиси еден час го читаше обвинението против Брејвик, вклучувајќи ги „актите за тероризам“ со наведување на имињата на сите 77 жртви и начинот како го загубиле својот живот, обвинетиот ги опиша своите постапки како „сурови, но непоходни“.
Според неговите тврдења, тој делата ги извршил сам, во самоодбрана, а против оние кои ги нарече „државни предавници“ поради „отворање“ на Норвешка и доведување до мултикултурализам со дозволување „муслиманска инвазија на Европа“.
Откако во судницата му беа извадени лисиците од рацете, тој ги поздрави присутните - роднини на жртвите, преживеани во нападите и новинарите, со дигната тупаница на десната рака.
Како што објасни самиот во својот манифест, ваквиот поздрав ја симболизира „силата, честа и предизвикот кон марксистичките тирани во Европа“.
Брејвик се претстави како „писател“, веројатно имајќи го предвид својот манифест, и изјави пред судиите дека не го признава норвешкиот суд.
Судскиот процес по делото за најкрвавиот масакр во Норвешка по Втората светска војна започна под значително зајакнати мерки за безбедност и со огромен медиумски интерес.
Предвидено е процесот да трае околу три месеци. Од утре Брејвик ќе се изјаснува за мотивите, кои го натерале да ги изврши нападите во Осло и на островот Утоја.
На 18 и 19 јуни ќе бидат изнесени два извештаја за психичката состојба на обвинетиот. Судските психолози во меѓувреме ќе продолжат да го набљудуваат Брејвик за време на судењата и ќе подготват дополнителен заклучок.
Се очекува процесот да заврши на 22 јуни, а пресудата да биде објавена пред годишнината од трагичниот настан на 22 јули.
Брејвик најверојатно ќе биде обвинет за тероризам и убиство. Максималната можна казна која му се заканува е 21 година затвор. Казната би можела да му биде продолжена доколку тој се смета за премногу опасен за општеството.