Прага, 19 ноември 2012 (МИА) - Чешкиот премиер Петр Нечас во телефонски разговор со израелскиот колега Бенјамин Нетанјаху, изминатиот викенд, му изразил поддршка во однос на одбрана од ракетните напади од Хамас, јави дописникот на МИА од Прага.
За време на викендот продолжија израелските напади на Појасот Газа, со кој Израел реагира на ракетниот оган, што претходно од палестинска територија беше отворен кон главниот град Тел Авив.
- За време на викендот со мене телефонски разговараше израелскиот премиер Бенјамин Нетанјаху и ме информираше за развојот на ситуацијата. Во разговорот јас изразив верување дека државата Израел има право на самоодбрана, се вели во изјавата на Нечас.
Денеска, според претходните планови, во четиридневна посета на Израел требаше да отпатува чешкиот претседател Вацлав Клаус. Но, поради безбедносни причини посетата е откажана.
Чешкото Министерство за надворешни работи, уште минатата среда соопшти дека „Чешка целосно го признава правото на Израел да се брани од ракетни напади од страна на милитантните организации во Појасот Газа, сметајќи дека е важно да се избегнат цивилните жртви“.
Шефот на чешката дипломатија Карел Шварценберг по пристигнувањето на состанокот со колегите од ЕУ не ја исклучил можноста за подземна интервенција на израелската армија доколку палестинските милитанти продолжат со бомбардирањето на израелската територија.
Сепак, Шварценберг изразил надеж дека двете завојувани страни ќе се согласат на примирје.