Киев, 24 јануари 2014 (МИА) – Лидерот на украинската опозиција Виталиј Кличко повика денеска приврзаниците да организираат генерален штрајк додека демонстрантите кои вчера зазедоа згради на државната администрација во Лавов и Ровн, подигнаа барикади околу тие објекти, јавуваат украински медиуми.
Обраќајќи им се на приврзаниците на опозицијата, собрани на Плоштадот независност во Киев, лидерот на партијата Удар (Украинска демократска партија за реформи) Кличко денеска повика на генерален штрајк.
– Властите мора да се соочат со генерален штрајк. Ако бидеме обединети, нема да не поразат. Ќе живееме во нова Украина уште оваа година, порача Кличко.
Учесниците во демонстрациите во Лавов и Ровн подигнаа барикади за да се заштитат од евентуални напади на полицијата и побараа веднаш да се одржат состаноци на регионалните совети со цел усвојување резолуција за ситуацијата во државата.