Рим, 15 април 2014 (МИА) - Судот во Милано денеска му одреди на поранешниот италијански премиер и милијардер Силвио Берлускони општествено корисна работа во траење од една година, како казна за минатогодишната пресуда во врска со затајување данок, објавија италијанските медиуми.
Берлускони истовремено ќе мора да ја почитува мерката за ограничено движење, што како што коментираат медиумите, претставува ново понижување за 77-годишниот италијански тајкун, кому претходно му е одземен пратеничкиот мандат во Парламентот и забрането му е да се кандидира на изборите во следните шест години.
Неговите адвокати претходно побараа од Судот да му дозволи еден ден во неделата да извршува општествено корисна работа во еден центар за хендикепирани и стари лица во близина на неговиот имот во предградие на Милано.
Берлускони минатата година е прогласен за виновен за затајување данок во врска со случајот за купување на телевизиските права на неговата империја „Медиасет“ во текот на ’90-те години од минатиот век.