Брисел, 16 април 2014 (МИА) - Генералниот секретар на НАТО Андерс Фог Расмусен денеска најави јакнење на военото присуство на Алијансата долж источните граници на територијата која ја покрива, како одговор на влошувањето на кризата во Украина.
- Денеска усвоивме пакет воени мерки, изјави тој по средбата на сите 28 членки на НАТО во Брисел и додаде дека тоа подразбира „поголем број авиони на небото, повеќе бродови во водата, поголема подготвеност на копно“.
Одлуката стапува во сила веднаш, а наскоро ќе бидат донесени нови мерки, најави Расмусен.
Тој не прецизираше кои нови сили ќе бидат распоредени и каде точно, но изјави дека НАТО ќе ги зголеми воздушните патроли над Балтичкото Море, додека дополнителен број бродови ќе бидат упатени кон Балтикот и кон источниот Медитеран, пренесува Танјуг.
Генералниот секретар на НАТО ја повика Русија да биде дел од решението од Украина, да ја запре дестабилизацијата на оваа земја, да ги повлече трупите од границата и јасно да покаже дека не ги поддржува екстремистите. Тој дополни дека истовремено верува дека единствен излез од кризата е изнаоѓање политичко решение.