Киев, 17 април 2014 (МИА) - Вршителот на должност министер за внатрешни работи на Украина Арсен Аваков, соопшти дека тројца проруски сепаратисти биле убиени во престрелка, која синоќа избувнала во градот Мариупол.
Според првичните податоци, тројца напаѓачи биле убиени, 13 повредени и 63 уапсени, објавил Аваков на својот профил на Фејсбук.
Претходно, војници од украинската Национална гарда пукале во воздух, кога толпа од проруски сепаратисти нападнале нивна база во близина на источниот град Мариуопол вчера, соопшти Министерството за внатрешни работи.
Голема група вооружени демонстранти пристигнале во базата и побарале војските на Националната гарда да го поддржат нивниот бунт против прозападната Влада на земјата, се наведува во соопштение на Министерството.
Проруски сепаратисти зазедоа повеќе згради во најмалку десет градови во Источна Украина. Градската администрација на Мариупол веќе е под контрола на сепаратистите.