Москва, 17 април 2014 (МИА) - Рускиот претседател Владимир Путин денеска изрази надеж дека нема да мора да го искористи своето право да испрати руска војска во Украина.
- Искрено се надевам дека нема да бидам принуден да го искористам ова право, истакна Путин, потсетувајќи дека на 1 март добил дозвола од Горниот дом на Парламентот да испрати трупи на украинска територија.
Тој, во редовното телевизиско одговарање на прашања од граѓани, порача дека неговото главно барање се однесува на гаранциите во врска со заштитата на правата на руската малцинска заедница во јужниот и источниот дел на Украина.
Рускиот претседател денеска првпат призна дека на Крим имало руски војници за време на мартовскиот референдум, кој овозможи украинскиот полуостров да биде присоединет кон Русија.
- Зад грбот на силите за самоодбрана секако, застанаа руски војници и дејствуваа многу коректно, но решително и професионално, изјави Путин за време на телевизиското обраќање.
- Во разговорите со своите странски колеги, јас не криев дека нашата задача се состоеше во тоа да обезбедиме услови за слободно изразување на волјата на жителите на Крим. Затоа бевме должни да ги преземеме неопходните мерки за настаните таму да не се развиваат онака како што се развиваат денес во југоисточна Украина. За да нема тенкови, воени единици на националисти и луѓе со сомнителен изглед, добро вооружени со автоматско оружје, изјави претседателот на Русија.