Москва, 18 јули 2014 (МИА) - Руската сателитска телевизиска станица „Раша Тудеј“„ која емитува вести на англиски јазик, тврди дека цел на ракетниот напад, со кој беше соборен малезискиот „Боинг 777“ над југоисточна Украина, не бил авионот на „Малезија Ерланс“ туку авионот на рускиот претседател Владимир Путин.
Според оваа верзија за соборувањето на патничкиот авион во реонот на Доњецк „украинската страна“ што телевизиската станица ја обвинува за тешкиот инцидент, верувала дека го имаат на нишан авионот „Ил 96“ со кој лета претседателот Путин, па врз него испукале една противвоздушна ракета.
Во оваа информација се тврди дека „грешката можела лесно да се случи“ затоа што рускиот службен авион е налик на соборениот „Боинг“.
Верзијата на оваа ТВ станица, која наведува на можноста за постоење заговор за убиство на претседателот на Русија, засега не предизвика коментар, ниту од украинска, а ниту од руска страна.
Единствено, неидентификуван извор близок до Кремљ објасни дека веќе неколку месеци претседателот Путин за време на своите патувања во странство, не го користи украинскиот воздушен простор.
Владимир Путин се враќаше од Бразил кон Москва по завршувањето на Самитот на земјите од групата БРИКС на која учествуваше, заедно си лидерите на Бразил, Индија, Кина и Јужна Африка.
Вкупно 298 патници и членови на екипажот загинаа кога авионот на „Малезија Ерлајнс“ што леташе од Амстердам кон Куала Лумпур се урна во граничниот реон на Украина и Русија.
Властите во Киев, за тоа веднаш ги обвинија проруските сепаратусти и Москва, тврдејќи дека „Боингот“ е соборен со руска ракета „БУК“.