Москва, 21 јули 2014 (МИА) - Рускиот претседател Владимир Путин порача синоќа, во телефонскиот разговор со британскиот премиер Дејвид Камерон, дека е важно да се покаже воздржаност од избрзани заклучоци и исполитизирани соопштенија, додека истрагата за падот на малезискиот „Боинг 777“ на истокот на Украина не биде завршена, соопшти синоќа прес-службата на Кремљ.
Путин рече дека коренот на трагедијата лежи во судирите во Украина, вклучувајќи ги регионите каде што авионот се урна и ја истакна одлучноста и подготвеноста на руската страна за помош во организација и спроведување детална истрага на Меѓународната организација за цивилен сообраќај околу сите околности на катастрофата, се наведува во соопштението.
Во телефонскиот разговор, што го иницирала британската страна, Путин изрази сочувство до Камерон за смртта на британските граѓани кои биле во малезискиот авион.
Британскиот премиер рече дека соборувањето на малезискиот патнички авион на истокот на Украина е „апсолутно неприфатливо“ и оти доказите укажуваат дека зад тој настан стојат „проруските сепаратисти“.