Самитот на НАТО во Велс е многу важенТбилиси, 25 јули 2014 (МИА) - Претстојниот самит на НАТО во Велс, во септември, е многу важен за зближувањето на Грузија со Алијансата, изјави денеска во Тбилиси претседателот на Парламентарното собрание на НАТО (ПС на НАТО) Хју Бејли, цитиран од ИТАР-ТАСС.
Според Бејли, Парламентарното собрание „дава и ќе продолжи на Грузија да и дава максимална поддршка во процесот на интеграција на земјата во Алијансата“.
Делегација на ПС на НАТО денеска пристигна во Тбилиси во дводневна работна посета за време на која ќе се сретне со претседателот, премиерот, министрите за надворешни работи и за одбрана, како и со претседателот на грузискиот Парламент.
Бејли во разговорите кажа дека „парлалено со грузиските реформи за интеграција во НАТО“ ќе се разгледа и „текот на приближувањето на земјата кон ЕУ, спогодбата за асоцијација со Европската унија и користа што овој документ ќе и ја донесе на Грузија“.
Пред еден месец генералниот секретар на НАТО Андерс Фог Расмусен во Брисел изјави дека на самитот во Велс ќе се донесе пакет мерки за забрзување на процесот на приклучување на Грузија кон Алијансата.
|