Изјавата на Обама предизвика збунетост во Москва

Москва, 30 јули 2014 (МИА) - Изјавата на американскиот претседател Барак Обама дека Москва не соработува во меѓународната истрага за утврдување на причините за уривање на малезискиот авион во Украина, предизвика збунетост во Русија, истакна портапролот на руското Министерство за надворешни работи, Александар Лукашевич.

Како што јави ИТАР ТАСС, тој потсети дека властите во Русија неодамна на прес-конференција на руското Министерство за одбрана приложија податоци од објективна контрола, поврзана со авионската несреќа, додека американската страна досега нема доставено никакви докази околку ова прашање, освен информации од социјалните мрежи и постојани обвинувања.

- Што се однесува до непосредната соработка, според стандардите на Меѓународната организација за цивилно воздухопловство, Русија не учествувала во несреќата со малезискиот авион и затоа не може да каже: „Здраво, почнуваме да учествуваме во истрагата“, нагласи Лукашевич.

Според него, Русија требало да добие официјална покана од меѓународната истражна комисија. Таква покана била добиена пред неколку дена, по што Москва итно именувала претставници, кои почнале да работат на истрагата.