Љубљана, 19 август 2014 (МИА) - Претседателот на Словенија, Борут Пахор денеска го номинира правникот Миро Церар за премиер, откако неговата новосоздадена левоцентристичка Партија на Миро Церар (ПМЦ) победи на изборите во јули.
Парламентот во рок од седум дена треба да го потврди именувањето на Церар (50), кој истакна дека не сака да продаде некои од најголемите државни претпријатија, предвидени за приватизација во рамките на напорите за стабилизација на словенечката економија.
ПМЦ освои најголем број гласови на предвремените парламентарни избори што се одржаа на 13 јули и има 36 пратеници од вкупно 90.
Церар ќе има 15 дена да го состави кабинетот, кој треба да биде одобрен од Парламентот. Се очекува Церар да ги заврши преговорите за коалиција со Демократската партија на пензионерите (ДЕСУС), со левоцентристичката партија Социјалдемократи и со Сојузот на Аленка Братушек.