Во Словенија е регистриран првиот случај на човек заболен од бабезиоза, ретка болест слична на маларијата, која доколку не се лекува во некои случаи може да биде и смртоносна, соопшти хрватскиот сајт Индекс.
Станува збор за инфекција, предизвикана од паразити од родот бабесија, кои се пренесуваат од крлежи и кои ги напаѓаат црвените крвни зрнца. Овие паразити се среќаваат главно кај животните.
Во Европа се забележани само неколку десетици случаи на пренесување на бабезиоза врз човек, соопштуваат словенечките медиуми.
Дека станува збор за првиот случај на ретката болест во Словенија беше потврдено со анализа на крвта на пациентка, која неодамна била примена во болница во градот Мурска Субота. Таа имала висока температура, гадење и болки во мускулите. Во нејзината крв биле откриени паразити, што било потврдено и од втората анализа, направена на Медицинскиот факултет во Љубљана.
Во Словенија крлежите многу почесто врз човекот ја пренесуваат лајмската барелиоза, исто така многу опасна болест. Годишно се регистрираат неколку илјади такви случаи.