Белгиски џихадист се заканува со напад на Антверпен

Брисел, 17 септември 2014 (МИА) - Белгиски џихадист, кој моментно се наоѓа во сирискиот град Рака и се бори на страна на екстремистичката група Исламска држава (ИД), во интервју за фламански весник изјави дека Белгија, поточно Антверпен, не треба да бидат изненадени доколку бидат нападнати од исламистите.

Тој вели дека Белгија им објавила војна на муслиманите, посочувајќи го како пример апсењето на портпаролот на самораспуштената исламистичка група „Шеријат за Белгија“, Фуад Белкасем. Друг пример, според него, е долгогодишното учество на белгиски војници во составот на ИСАФ во Авганистан.

Според него, Германија, исто така, е следна која треба да очекува да биде нападната, бидејќи ги поддржува Курдите во Ирак, кои се борат против ИД.

Џихадистот објаснил дека „откако ќе ја завршат работата во Ирак и Сирија, борците на ИД ќе се насочат кон Јордан и Либан, а крајна цел им е ослободување на Ерусалим и Палестина, како и бомбардирање на Израел“.