Москва,18 септември 2014 (МИА) - Телевизиската екипа на Би-Би-Си е нападната во јужниот руски град Астрахан,откако камерман и дописникот на таа британска медиумска компанија во Москва,ја испитувале смртта на еден руски војник,за кој се знае дека бил убиен во близината на границата со Украина. Во нападот камерманот бил соборен на земја,а потоа претепан.
Неговата камера била уништена,а целиот снимен материјал бил избришан. Би-Би-Си вложи денеска официјален протест до руските власти и побара да се испита целиот случај и да се најдат и казнат напаѓачите.
Властите во Астрахан го потврдија инцидентот и соопштија дека веднаш е покрената истрага.
Според британските репортери,нападот се случил откако камерманот и новинарот излегле од едно локално кафуле,подготвувајќи се за враќање во Москва. Тројца мажи го заобиколиле возилото на Британците,па прво започнале расправија,а потоа се нафрлиле врз камерманот.
Во нападот тој не бил посериозно повреден,па двјцата заминале во полицијата за да пријават што се случило.
Полицајците ги задржале двајцата Британци цели четири часови,,испрашувајќи ги за инцидентот.
Снимениот материјал останал во нивнто возило,но репортерите подоцна утврдиле дека се избришани сите податоци,како и целиот снимен материјал за случајот, кои се наоѓале во лаптопот на британскиот репортер и во неколку мемориски картички.
Властите на Астрахан го оквалификуаа инцидентот како „криминален случај“.
Во протестот на Би-Би-Си,меѓутоа,се вели дека нападот бил „усогласен и синхронизиран“ за да се уништи снимениот материјал за рускиот војник.