Советот на ЕУ ќе разговара за натамошните чекори

Луксембург, 20 октомври 2014 (МИА) - Советот за надворешни работи на ЕУ на денешната седница ќе направи оценка за спроведувањето на договореното од Минск за Украина и ќе донесе решение за натамошните чекори за евентуална измена на режимот на санкции кон Русија, изјави високата претставничка на ЕУ за надворешна политика и безбедност, Кетрин Ештон.

- Ќе ја разгледаме ситуацијата и ќе одлучиме какви ќе бидат идните активности, истакна Ештон по нејзиното пристигнување во Луксембург на средба на шефовите на дипломатии на 28-те земји-членки на Унијата.

Според ЕУ, клучните фактори за делумно или целосно укинување на санкциите кон Русија се почитување на примирјето во зоната на конфликтот, видливи напори на Москва да се постигне стабилизација и исполнување на условите од договорот во Минск.

Шефот на данската дипломатија Мартин Лидегор нагласи дека се уште не е дојден моментот за олеснување на санкциите на ЕУ кон Русија. Од друга страна, пак, неговиот литвански колега Линас Линкевичус предупреди дека Унијата може да воведе и нови санкции, доколку ескалира состојбата во источниот дел на Украина.