Варшава, 21 октомври 2014 (МИА) - Рускиот претседател Владимир Путин во 2008 година му предложил на поранешниот полски премиер Доналд Туск да ја поделат Украина, изјави претседателот на полскиот Парламент, Радослав Сикорски, во интервју за американскиот сајт Политико.
Прес-секретарот на рускиот претседател Дмитриј Песков статијата за предлогот на Путин за поделба на Украина ја нарече „трачарење“ и дополни дека не е особено запознат со „творештвото на овој сајт“, пренесе ТАСС.
Според Сикорски, кој до септември беше министер за надворешни работи на Полска, Путин предлогот го дал за време на посетата на Туск на Москва во 2008 година.
- Тој побара од нас да бидеме учесници во таа поделба на Украина. Тоа беше едно од првите нешта кои Путин му ги кажа на мојот премиер Доналд Туск, кога ја посети Москва, изјавил Сикорски.
- Тој (Путин) изјави дека Украина е вештачка земја, дека Лвов е полски град и зошто да не земеме заедно да ги средиме нештата, изјавил Сикорски во интервјуто објавено на 19 октомври.