Москва, 22 октомври 2014 (МИА) - Рускиот министер за надворешни работи Сергеј Лавров предупреди денеска на опасноста од едностраните чекори во решавањето на проблемите во светот, јави ТАСС.
- Светот денес станува полицентричен и мултиполарен. Да се биде свесен за оваа вистина би требало да послужи како предупредување против обидите на една група држави да ги диктираат решенијата на другите. Ова се уште не е искоренето, рече Лавров на состанок со претставници на Граѓанската младинска комора во Москва.
- Во ситуациите, каде мора да постои заеднички пристап, гледаме еднострани чекори, кои го поткопуваат успехот на нашите решенија, истакна шефот на руската дипломатија.
Според Лавров, изминатите неколку години „можевме да видиме каде сето тоа не доведе“.
- Имаше агресија врз Југославија, илегална интервенција во Ирак и бомбардирање на Либија. Сега тоа можеме да го видиме и во Сирија, рече Лавров.
Тој нагласи дека украинската криза е директна последица на обидите на западните држави да „ги зачуваат и поместат кон исток поделбите во евроатланскиот простор“.
- Ние сме против таквите обиди. Не сакаме конфронтации, но ќе бидеме одлучни во одбрана на нашите интереси и постапување на начин, кој го сметаме за правичен врз основа на меѓународното право. Веруваме дека тоа е најдобар начин за обезбедување на интересите на Русија, заклучи Лавров.