Гетеборг, 24 октомври 2014 (МИА) - Врховната команда на шведските Вооружени сили денеска соопшти дека ја прекинува операцијата на потрага по општетена подморница во водите околу архипелагот кај Стокхолм, јави дописникот на МИА од Гетеборг.
Едновремено медиумите пренесоа дека Министерството за одбрана на Русија ја окарактеризира подводната операција на шведската морнарица како неоснована, изнесувајќи едновремено уверување дека потрагата по наводно оштетена подморница во шведските територијални води само ги зголемува тензиите во регионот.
Според шпекулациите, кои добија голем публицитет во шведските медиуми во изминатите денови, станува збор за руска подморница.
- Сведоци сме на целосно неосновани акции од страна на шведската одбрана, базирани врз реторика од времето на Студената војна, изјави во Москва генерал-мајор Игор Конашенков, портпарол на руското Министерство за одбрана.
Конашенков истовремено забележува иронично дека станува збор за „трагикомедија“ и дека според неговото мислење, шансите да се најдат руски траги во шведските води се исто толку големи како и шансите познатите ликови од шведската литература за деца „Филе и Руле да го фатат Карлсон на покривот“.