Русија вечерва се враќа на зимското сметање на времето, ставајќи крај на тригодишниот експеримент, за време на кој цела година важеше летното сметање на времето.
Земјата, исто така, го враќа моделот на 11 часовни зони, кои се простираат од Камчатка во Тихиот Океан до Калининград на границата со Европската унија, а кои поранешниот претседател Дмитриј Медведев ги намали на девет зони.
Една од главните промени за време на претседателскиот мандат на Медведев беше воведувањето на постојано летно сметање на времето со аргументот дека поместувањето на сказалките на часовникот го нарушува биоритамот на луѓето. Тогаш повеќето Руси негодуваа затоа што беа принудени да стануваат еден час порано во мрачните и студени зимски утра.
Во јули, претседателот Владимир Путин го потпиша законот со кој се стави крај на овој систем и ги врати часовниците на зимското сметање на времето.
Белорусија, следејќи го примерот на Москва, исто така во 2011 година премина на постојано летно сметање, но сега претседателот Александар Лукашенко одбива да го врати зимското сметање на времето.