Вашингтон, 11 ноември 2014 (МИА) - Русија може да плати уште повисока цена поради неисполнувањето на договорот од Минск за Украина, изјави вчера потпретседателот на САД Џозеф Бајден.
Бајден тоа го истакнал во телефонски разговор со претседателот на Украина Петро Порошенко.
- Потпретседателот истакна дека, ако Русија продолжи намерно да ги крши условите од договорот во Минск, ќе плати уште повисока цена за тоа, објави Белата куќа.
Двајцата државници разговарале за ситуацијата во Источна Украина, составувањето на новата влада и ангажманот на земјата за спроведување на реформи.
Бајден, исто така, повикал што е можно побрзо да биде формирана коалиција, што ќе дозволи украинската Влада да продолжи со реформи и исполнувањето на преземените ангажмани кон украинскиот народ по парламентарните избори на 26 октомври.
Двајцата, меѓу другото, разговарале и за претстојната посета на американскиот потпретседател на Украина на 21 ноември.