Москва, 13 ноември 2014 (МИА) - Претседателката на Советот на федерацијата, Горниот дом на рускиот парламент, Валентина Матвиенко изјави дека Западот потрошил пет милијарди долари за дестабилизација на Украина.
- Украинската криза докажа дека информациската технологија вклучувајќи интернет и социјални мрежи, може да направи лажна реалност и да ја измени свеста на нормалните луѓе заради корист на одредени политичари, изјави Матвиенко.
Таа вели дека тие пари се потрошени против легитимните украински власти.
- Затоа е неопходно да се знае ефикасно да се користи информациската технологија во спречување на зло и спротивставување на оние кои се обидуваат да ја сокријат вистината, додаде таа.
Протестите против украинските власти почнаа во ноември 2013 година, а во февруари 2014 година претседателот Виктор Јанукович беше симнат од власт. Украинската армија и проруски сили водат на исток во државата речиси секојдневно борби и покрај договорот за прекин на огнот постигнат во септември. Според ОН, во судирите на исток во Украина од средината на април досега загинаа околу 3.700 луѓе и преку 9.000 се повредени.