Џихадист со косовско потекло осуден за членство во „Исламска Држава“

Берлин, 30 јануари 2015 (МИА) - Судот во Франкфурт пресуди 3,9 години затвор за германски државјанин поради членство во забранетата организација „Исламска Држава“, јавува дописникот на МИА од Берлин. 
 
Во првиот судски процес од овој вид Крешник Бериша (20) кој е роден во Германија, во семејство доселеници од Косово, ја избегнал највисоката казна затоа што признал дека минал шест месеци со единици на ИД во Сирија. Тој бил уапсен на аеродромот во Франкфурт по враќање од Сирија и се борел во градот Алепо каде загинаа и неколку македонски државјани во битките против силите на претседателот Башар ал Асад. Според израелските медиуми Бериша до пред три години играл фудбал за младинскиот еврејски клуб Макаби од Франкфурт.
 
Делото за кое Бериша добил казна од вкупно 45 месеци е придружување на странска терористичка организација а на листата на забранети организации од овој тип во Германија се и Ал Каеда и курдската партија ПКК.
 
Германските власти веруваат дека повеќе од 500 Германци биле дел од радикални терористички органзации во Ирак и Сирија. Според западните агенции,  60 од нив умреле во самоубиствени напади а над една третина се веќе вратени во Германија.