Американскиот конвој пристигна во ЧешкаПрага, 29 март 2015 (МИА) - Американскиот конвој кој учествуваше на воената вежба на НАТО во Литванија, Естонија и Полска на патот кон нивната база во германскиот град Вилсек, изутрината пристигна во Чешка, јави дописникот на МИА од Прага.
Воената парада ,„Змејски лет", која вклучува околу петстотини американски војници и повеќе од 100 воени транспортери кои САД планира да ги стационира во Европа, на чешка територија беше пречекана од десетици поддржувачи и противници.
Военото дефиле има за цел да ја покаже поддршката на европските сојузници во НАТО кон Армијата на САД, наспроти руската агресија кон Украина.
Токму тоа е причина за критика на левичарските и проруските групи во Чешка кои вчера оддржаа протести, а ги најавија и денеска, повикувајќи на блокирање на движењето на конвојот. Чешката Армија уште претходно најави дека е подготвена со сопствените војници да го штитат конвојот и да обезбеди алтернативни патишта за минување низ земјата без инциденти.
Поддржувачите на Армијата на САД, напротив сакаат да ги пречекаат учесниците на воената вежба и веќе се планирани средби на граѓаните со војниците и разгледување на нивната техника.
В понеделник американската војска минува низ чешкиот главен град, а чешката територија според планот ќе ја напушти в среда.
|