Лобист на „Монсанто“: Пестицидот е безбеден, но не сакам да го пијамПариз, 29 март 2015 (МИА) - Лобистот на компанијата „Монсанто“ Патрик Мур изјави дека е безбедно да се испие еден литар пестициди, но одби да се напие за време на интервјуто за француската телевизија „Канал плус“ и го напушти студиото.
Мур изјави дека глифосфатот, активна супстанца на пестицидот „Раундап“ на „Монсанто“ не е одговорен за пораст на случаите на канцер во Аргенитина.
- Можете да испиете еден литар и ништо нема да ви штети, истакна Мур, но кога новинарот му кажа дека за него подготвиле чаша со пестицидот „Раундап“, бурно реагираше и одби да се напие, изјавувајќи дека „не е глуп“.
Мур повторуваше дека пестицидот не е опасен за луѓето, истакнувајќи оти некои луѓе се обиделе да се самоубијат со пестицидот „Раундап“, но оти не успеале.
Тој го напушти студиото, а новинарот го нарече „кретен“.
Мур е биолог, кој претходно работеше на заштита на животната средина во „Гринпис“, а потоа стана лобист на „Монсанто“, лидер во производството на генетски модифицирана храна (ГМО).
Агенцијата за истражување на канцерот при Светската здравствена организација минатата недела објави извештај во која се наведува дека глифосфатот најверојатно е канцероген за луѓето.
„Монсанто“ побара СЗО да го повлече извештајот, тврдејќи дека истиот е пристрасен и неважечки.
„Монсанто“ првпат употреби пестициди за уништување на коров на база на глифосфат во 1974 година, но тие станаа популарни во 90-тите години од минатиот век.
|