Италијанската Морнарица го ослободи бродот заробен од либиските властиРим, 17 април 2015 (МИА) - Италијанската Воена морнарица ја презеде контролата врз еден сицилиски рибарски брод, што беше заробен од либиската крајбрежна стража на околу 64 километри од брегот на Либија.
Претставник на Министерството за одбрана во Рим соопшти дека италијанските морнари се наоѓаат на заробениот брод.
Претходно се стравуваше дека бродот со тројца италијански членови на екипажот и четворица Тунижани, е одведен во либиското пристаниште Мисрата.
Либиските власти ја оправдуваат својата интервенција со тврдењето дека бродот навлегол во територијалните води на Либија. Тие потврдуваат дека ги одвеле сите седумина морнари и ги затвориле.
Во изјава за Би-Би-Си, претставник на крајбрежната стража на Либија рече дека рибарите ловеле без дозвола и длабоко навлегле на либиската територија, додавајќи дека целата операција била изведена без да биде истрелан ниту еден куршум.
Засега не се знае каква е состојбата со заробените рибари.
Во операцијата за ослободување на бродот учествувале италијанските морнарички сили кои патролираат по Медитеранот, поради напливот на илегални имигранти од Африка и Блискиот Исток, а кои за префрлање во Италија и Европа ја користат либиската територија.
Асоцијацијата на италијанските рибари остро ја осуди интервенцијата на Либијците, нарекувајќи ја „акт на пиратство“.
Според објаснувањето на асоцијацијата, ова е веќе 12-ти случај на „грабнивање“ италијански рибарски брод и тоа се случува откако властите во Триполи, еднострано ја проширија зоната на своите територијални води на 112 километри, што е многу повеќе од важечките меѓународни прописи.
|