Москва, 27 април 2015 (МИА) - Претседателот на Руската федерација Владимир Путин изјави дека Русија штитејќи ги своите интереси ќе оди до крај. Тој оцени дека со враќањето на Крим во рамки на Русија е направено се како што треба и оти за ништо не жали.
Путин во филмот „Претседател“ изјави дека најважно било да се сфати што сакаат луѓето кои живеат на Крим.
- Им кажав дека луѓето за нас се од животна важност. Не знам какви интереси ќе штитите, но ние штитејќи ги нашите ќе одиме до крај. И тоа е многу важна работа, истакна Путин.
Тој нагласи дека Русија не можела да ги напушти луѓето кои сакале да се вратат во рамките на Руската федерација и кои „не сакале да бидат под власт на бандеровци и националисти“.
- Не затоа што ние нешто сакаме да одземеме или одвоиме. Па дури ни затоа што Крим има стратешко значење во базенот на Црното Море. Туку затоа што тоа е елемент на историска праведност. Сметам дека исправно постапивме и за ништо не ми е жал, порача претседателот на Русија.