Даблин, 22 мај 2015 (МИА) - Во Ирска денеска се одржува референдум за легализација на истополовите бракови во оваа доминантно католичка земја.
Повеќе од 3,2 милиони гласачи треба да се определат дали се согласуваат во Уставот на земјата да се додаде амандман со кој ќе им се овозможи на геј и на лезбејските двојки да ги легализираат своите врски со формален брак.
Првите резултати од денешното референдумско изјаснување, се предвидува да бидат познати утре во раните утрински часови.
Според ирскиот закон, право да гласаат на референдумот имаат само Ирците и ирските државјани кои се регистрирани и живеат на територијата на Ирска.
Референдумот за истополови бракови се одржува 22 години по одлуката на Даблин да се декриминализира хомосексуалноста во Ирска, која до 1993 година претставуваше кривично дело.
Истополовите бракови досега се легализирани во 19 земји.