СДСМ денеска на прес-конференција, која се одржа пред Владата на Република Македонија, објави нова серија прислушувани разговори.
Разговорите, како, што рече претседателот на СДСМ Зоран Заев, биле водени меѓу премиерот Никола Груевски и Миле Јанакиевски и Влатко Чинго, меѓу Гордана Јанкулоска и Митко Чавков и Горан Трајковски.
Од нив, како што рече, се слушаат признанија дека не и оди работата на Владата, дека од позиција на власт се влегува во беззаконие, поништување на Уставот и законите. Може, рече Заев, да се види беззаконие за ослободување на сопственик на фирма затоа што бил партиски донатор, како и влегување во архивите, односно барање оригинален документ да исчезне од архивите на МВР...
Одговарајќи на новинарско прашање Заев истакна дека очекува разврска на политичката криза во земјава до крајот на јуни. За него решение за излез од кризата е преодна влада во која Никола Груевски нема да биде премиер, а ќе има за цел да направи подготовки за фер избори.
Побара ослободување на приведените за „Пуч“, бидејќи, како што рече, по интервјуто на премиерот Груевски во кое истакнал дека зад случајот не стојат странски служби, обвиненијата паѓаат во вода.
Во врска со информацијата која беше пренесена како дел од интервју на Заев за германски медиум дека невини лица се во затвор за случајот „Монструм, истакна дека најверојатно станува збор за грешка во интерпретацијата, иако, како што рече, големи сомневања се врзани за овој случај.