Гевгелија, 4 јули 2015 (МИА) - Од втората половина на месецов, Агенцијата за вработување на РМ со посредство на Владата на секое инвалидизирано лице кое што сака да започне сопствен бизнис ќе му понуди 5 илјади евра грант, а доколку вработи уште двајца уште по 1.500 евра грант за секое од нив. Тие двајца можат да бидат инвалидизирани лица, но и не мора, најави денеска премиерот Никола Груевски во одговор на прашање по посетата на целосно реновираното ОУ „Јосиф Јосифовски“ во Гевгелија.
- Веќе во буџетот за оваа година се резервирани еден милион евра за оваа намена, а доколку се случи да има голем наплив на добри проекти кои ќе бидат прифатени и ќе почнат да се реализираат ќе се додадат средства, рече премиерот Груевски.
За следната година, додаде, повторно ќе се издвојат средства во буџетот за оваа намена.
- Тоа ќе биде помош за оние инвалидизирани лица кои чувствуваат дека можат да започнат бизнис кои имаат добра бизнис идеја и добар бизнис план и кои сакаат да влезат во една ваква операција, рече премиерот Груевски.
Потсети дека Владата и досега нудела поволности за инвалидизираните граѓани и преку Македонски шуми, како што кажа, веќе се вработени над 200 вакви лица, а за стотина други постапката е се уште во тек.
- План ни е со мерката која што ја донесовме да се заокружи околу 300 вработувања во јавниот сектор, истакна премиерот Никола Груевски.