Министерот без ресор Неждет Мустафа во посета на велешка Рамина

Велес, 28 јули 2015 (МИА) - Министерот без ресор Неждет Мустафа денеска заедно со градоначалникот на Велес Славчо Чадиев, направи увид во започнување на градежните работи за средување пет улици во велешка Рамина. 
 
Како што информира министерот Мустафа овој проект е во рамки на проектот „Декада на Ромите“, а во висина од 2 милиони денари  со средства кои ги обезбеди Владата. Остатокот од 700 илјади денари за досредување на улиците и сите останати потреби на  ромското насление во овој дел од Велес со 700 куќи  го обезбеди Општина Велес.
 
Министерот Мустафа потенцира дека со овој проект многу ќе се подобрат условите на ромското население во овој дел на Велес.
 
Според градоначалникот Славчо Чадиев проектот е резултат на одличната соработка на Владата и Општина Велес.
 
- Ќе се нивелира околу   4 илјади метри квадратни површина и ќе се бетонираат, со тоа засекогаш ќе го решиме проблемот  во овој дел од градот. Ќе се завршат пет крака од улицата „Јордан Џурнов“,потоа дел од краците на улицата „Благој Кирков“ и улицата „Благој Страчковски“, потенцира Чадиев и додаде оти привршува и водоснабдувањето на жителите од овој дел од градот.