Над стотина кандидати за улога во филмот „Златна петорка“

Струмица, 28 јули 2015 (МИА) - Над стотина лица од различна возраст и пол денеска во Домот на АРМ во Струмица ги покажаа своите актерски способности на кастингот за улога  или статисти во новиот долгометражен игран филм со работен наслов  „Златна петорка“ на  режисерот Горан Тренчовски. 

- Заедно со продуцентот Дејан Милошовски и луѓето од „Револушен“ денеска имавме многу успешен и интересен кастинг. За мене стотината учесници, меѓу кои имаше чисти професионалци, но и аматери и натуршчици, е сосема очекувано, ако се има во предвид дека во Стумичко работат повеќе културно-уметнички друштва и драмски секции во средните училишта. Задоволни сме од денешниот кастинг, добар дел од кандидатите ги исполнуваат основните услови и ќе бидат дел од актерската екипа на „Златна петорка“, рече режисерот Тренчовски.

Вториот кастинг за играниот филм „Златна петорка“, кој е поддржан од Агенцијата за филм на РМ, е на 31 јули во просториите на „Вардар филм“ во Скопје во периодот од 9 до 14 часот.