Интернационална вечер на Фестивалот „Илинденски денови“ во БитолаБитола, 31 јули 2015 (МИА) - Фестивалот на народни песни и игри „Илинденски денови“ продолжува со интернационална вечер на која ќе настапат Ансамбл „Баладеле Делтеи – Дорулетул“ – Тулчеа од Романија, Фолклорен ансамбл „Туропоље“-Велика Горица од Хрватска, градското КУД „Севдах“ од Врање, Србија, ансамблот „Куартиере Вилланова ди Каљари“ од Сардинија, Италија, Ансамбл „Курпие Зиалоне“-Биалисток од Полска и ансамблот „Македонка“ на македонците иселеници во Торонто, Канада.
- Сме биле насекаде низ светот, но во Македонија и во Битола доаѓаме првпат. Забележавме дека фестивалот предизвикува голем интерес и е посетен од многубројна публика, истакна Андреј Дурдал, претседател на Ансамбл „Курпие Зиалоне“-Биалисток од Полска.
Директорот на Ансамбл „Баладеле Делтеи – Дорулетул“ – Тулчеа од Романија, Штефан Коман посочи дека во Македонија гостувале 14 пати, но исто како и друштвото од Полска, во Битола имаат премиерно гостување.
- Импресионирани сме од историјата на градот, го погледнавме Музејот и Хераклеа, а посебно ни се допадна стариот дел во центарот на градот кој има идентични детали како Букурешт. Македонците се многу добри и приемчливи луѓе и тоа многу ни се допадна, истакна Коман.
Вечер на Широк Сокак во Битола ќе настапи и ансамблот „Македонка“ од Торонто-Канада, еден од најпознатите ансамбли на македонски народи песни и игри во Торонто и воопшто на Северно Американскиот континент, чиј основач и учител e Александар Алек Петличков. Ансамблот „Македонка“ гостувал насекаде во светот, а гостувањето во Македонија годинава го помогна Агенцијата за иселеништво на Република Македонија.
За постигнатото и заслугите за Македонија, на 21-ви јули оваа година, Претседателот на Република Македонија го одликува ансамблот „Македонка“ со признанието „Повелба на Република Македонија“.
|