Заврши конзервацијата на фрескоживописот на црквата „Св.Богородица“ во ВелушинаБитола, 26 август 2015 (МИА) - НУ Завод и Музеј-Битола ја заврши конзервацијата врз фрескоживописот на црквата „Св.Богородица“ во битолското село Велушина.
Станува збор за континуирана грижа на црковниот храм која почна во 2004 година со препокривање, а денес заврши конзервацијата на фрескоживописот, истакна Ристо Палигора, вработен во НУ Завод и Музеј-Битола.
- Годинава работевме на ѕидното сликарство насликано во првата половина на 19 век, но под него се наоѓа уште едно фреско сликарство кое потекнува од 10 век. Овој храм е од исклучително значење и државна вредност која егзистира повеќе од илјада години. Гледано историски во оваа црква се наоѓа прв целосно отсликан споменик кој е во редот на првите такви споменици каков што е манастирот Св.Наум на Охридско Езеро и делови од Бигорскиот манастир, појасни Палигора.
Во наредниот период ќе се конзервираат иконите и други содржини на црквата „Св.Богородица“ во Велушина со што овој објект ќе биде во функција на развојот и директен придонес за туризмот.
|