Промовирана Фондацијата „Ѓорѓија Џорџ Атанасоски“Скопје, 7 октомври 2015 (МИА) - Промовирање на македонската култура и традиција и грижа за македонското културно и духовно наследство е целта на Фондацијата „Ѓорѓија Џорџ Атанасоски“ која денеска беше промовирана во хотелот „Александар Палас“ во Скопје.
Според основачот на Фондацијата Ѓорѓија Џорџ Атанасоски, обврска е на секој успешен бизнисмен да инвестира во развојот на својата татковина.
- Целиот мој живот и сите мои активност се насочени кон зачувување на уставното име, заштита и унапредување на македонскиот националниот идентитет и грижа за сите македонци кои живеат надвор од татковината, истакна Атанасовски.
Ние, како Македонци, рече тој, не смееме да се обесхрабруваме дури и тогаш кога битката за македонскиот национален идентитет, јазик и култура е долга, макотрпна, на моменти и фрустрирачка, како што тоа е случај во соседна Грција, како резултат на ирационалната политика на официјална Атина.
Директорот на Фондацијата Николас Атанасоски истакна дека таа ќе ги стипендира најдобрите ученици, студенти, како и дека ќе го потикнува спортскиот дух.
- Ќе го развиваме и претприемништвото кај младите преку едукативни програми и поддршка на мали бизниси. Ќе издаваме публикации, ќе организираме дебати и трибини за македонското културно творештво. Ќе ја развиваме етничката толеранција и ќе промовираме социјални проекти од интерес на заедницата, рече Атанасоски.
Фондацијата ќе спроведува широк спектар активности насочени кон промоција на на македонската култура и традиција преку оформување владини политики и преку поддржување на образованието, медиумите, јавното здравство, човековите права и правата на жените, како и на социјалната, правната и економската реформа и спортот.
|