Во Велес промовирано ДВД - 60 години Ансамбл „Керамичар“Велес, 7 октомври 2015 (МИА) - На големата сцена на новата театарска зграда на Народниот театар „Јордан Хаџи Константинов-Џинот“ во Велес синоќа свечено беше промовирано ДВД–то 60 години Ансамбл „Керамичар“.
ДВД-то го промовира м-р Бошко Тренески, долгогодишен директор на Ансамблот „Танец“, кој потсети дека Ансамблот за народни игри и песни „Керамичар“ во изминатите шест децении беше еден од чинителите во Македонија кој го негуваше, надградуваше и афирмираше непресушниот народен вруток со акцент на богатата песнопојна и играорна традиција од цела Македонија.
- Репертоарот на ансамблот го сочинуваат песни и ора од цела етничка Македонија преточени во фолклорни кореографии прилагодени според возраста на младите уметници, изработени од професионалци во фолклорот. Покрај кореографските постановки ансамблот ја негува богатата песнопојна народна и градска традиција, рече Тренески.
Информира дека на ДВД-то се претставени играорците со голем број ора од повеќе региони на Македонија, инструменталните достигнувања на оркестарот преку повеќе народни и чалгиски ора, како и солистите на ансамблот во исполнување на народните песни.
Тренески воедно потсети дека од 1954 година до денес Ансамблот „Керамичар“ настапил на над 3.700 концерти и фестивалски претставувања во 24 земји во Европа, Азија и други континенти од каде секогаш се враќал со награди и признанија.
Меѓу позначајните награди на Ансамблот „Керамичар“ се: „Бронзен гердан“ освоен на ММФ во Дижон Франција во 1981 година, „Сребрен гердан“ освоен на ММФ во Дижон Франција во 1993 година, „Сребрен медал“освоен на Детски Фолклорен Фестивал во Адапазар Турција во 2013 година, и во 2014 година Спомен плакета „9 Ноември“ на општина Велес.
Промоцијата беше збогатена со настап на првата постава на играорната група и оркестарот на Ансамблот „Керамичар“ и Трајче Ламјов од пеачката група.
|