Скопје, 26 ноември 2015 (МИА) - Министерот за надворешни работи Никола Попоски, денеска, во рамки на посетата на НР Кина, како дел од македонска делагација, предводена од премиерот Никола Груевски, се сретна со кинескиот колега Ванг Ји.
Како што соопшти МНР, Попоски ја повтори цврстата поддршка на Република Македонија на процесот 16+1 и интересот за нашето понатамошно вклучување во инфраструктурните проекти кои произлегуваат од овој процес.
- Во делот на меѓусебната соработка, беше дискутирано околу можни проекти во делот на енергетиката, железничката инфраструктура, индустријата и туризмот. Исто така, од македонска страна беше поздравена намерата на НР Кина за финансиска помош кон жариштата на кризи кои генерираат зголемен број бегалци кон Европа, како и излегување во пресрет на потребите на земјите кои се соочени со бранот мигранти, особено по Балканскиот коридор, стои во соопштението.
Министрите за надворешни работи на двете земји, се додава, изразија взаемно задоволство од соработката помеѓу двете земји на мултилатерален и културен план.