Заклетва на новата група волонтери на Мировен корпус

Скопје, 30 ноември 2015 (МИА) - Новата група американски волонтери кои пристигнаа во Македонија во септември годинава, на 4 декември ќе дадат свечена заклетва пред амбасадорот на САД Џес Л. Бејли.

Новите 41 волонтер се приклучуваат на повеќе од 500 волонтери кои служеле во Македонија од 1996 до денес. Ова е дваесетта група волонтери што ќе служи  во Македонија. Волонтерите на Мировниот корпус во моментов служат во 64 земји, а нивниот број е над 6.800.

Волонтерите ја даваат заклетвата по успешното завршување на интензивната, единаесетнеделна обука која вклучува изучување на македонскиот и на албанскиот јазик, културата и традицијата во Македонија, како и стручна подготовка за натамошната работа во земјава. По давањето свечена заклетва, волонтерите на Мировен корпус почнуваат со нивната  двегодишна работа во заедници низ Македонија.